السلام عليكم .ممكن تنزل مشكلتى انا متزوج وعندى ولد وبنت… انا هتكلم بما يرضى الله زوجتى كانت كويسة جدا معايا بتعاملنى كويس جدا انا واهلي وراضية بظروفي

بس حصلت ليا مشاكل صحية كبيرة اول الجواز ووقفت جنبي وكانت بتهون عليا تعبى دايما ربت الاولاد وعلمتهم بنفسها لحد اعدادى مكانتش بتطلب مصاريف للدروس ولا حتى لنفسها لما كانت بتلمح انها عايزة مصروف كنت بتهرب واقولها ان شاء الله لما ربنا يكرمنى ولا كنت حتى بديها عدية بس كنت بصرف اكل وشرب ولبس كنت بوفر الفلوس واحوشها لاى زنقة وبسبب مرضى بس انا مكنتش بتعامل معاها ذى معاملتها لية …

انا مش اجتماعى ذيها ولا بزور اهلها ولا حتى بروح معاها في اى مناسبة تخصها وكانت دايما تشتكى وتقولي انت بتسبنى لوحدى ازور اهلي عايزاك تكون معايا انا بتحرج وانا لوحدى واخواتى معاهم اجوازهم بس كنت بقولها وانا مالي انتى بتزورى اهلك انتى هى كانت تزعل وتسكت ولما والدها تعب مكنتش بودهم كتير لحد ما توفي هى دخلت في حالات اكتئاب كذا مرة لانها حساسة اوى بتهتم بالناس والواجب والأصول وكانت دايما مهتمة باهلي وبضايفهم احسن استضافة يمكن احسن من اهلها وبتتعب معاهم جدا مش بتسبهم في اى مناسبة

ولما تقولي انا براعى اهلك من الكبير للصغير ارد واقولها مطلبتش منك تعملي كدا متبقيش تروحى عندهم تانى تقولي بعمل عشان بحبك وقبلها برضي ربنا…

اختها كانت بتولد في الفجر قالتلي تعالي ودينى لاختى قولتلها انا مالي انا تعبان وعندى شغل قالتلي اختى ولازم اكون معاها لان والدتهم متوفية

نزلت الفجر لوحدها وراحت لوحدها لاختها ومعاتبتنيش..

كنت ماثر معاها في كل حاجة بس غصب عنى انا مش اجتماعى وكمان عشان تعبي كنت بحاول اساعدها بالبقدر عليه …

هى ساعدتى بكل شئ ومرت الايام والسنين وربنا فتح عليها واكرمها كرم كبير من فلوس ومركز وورث وانا حصل معايا بالعكس تعبت اكتر وبصراحة وقفت جنبي كتير وبعت عربيتى وهى اشترت عربية وسيبهالي اسوقها مراعية ظروفي الصحية وبصراحة ماثرتش معايا لا انا ولا الاولاد من خدمة وممكن تصرف علي احتياجات اولادنا ومصاريفها …

حاولت تغيرنى كتير عشان احس بيها انا مش عاطفي زيها وكمان مش اجتماعى انا جد جدا في حياتى هى اتغيرت بقالها سنتين معايا بقت تتجاهلنى نهائي وبقيت مش فارق معاها زعلي ذى زمان بالعكس بتلاقي راحتها لما بسيبها زعلانة زمان لما كنت اسيبها زعلانة مكانتش بتاكل ولا تشرب كويس دلوقتى اتغيرت معايا اوى وكل خناقة تقولي انت ظلمتنى وافتريت عليا وعارف انك عندك مشاكل نفسية وصحية تعبتنى وشيلتنى فوق طاقتى كل البينا مودة ورحمة انا براعى ربنا فيك طول الوقت عشان خايفة من ربنا بس انت لا. انت ضيعت كل حاجة بينا

كنت بحاول اضايقها واقولها خلاص نتطلق لو مش عيزانى تقولي براحتك انا مبقاش فارق معايا حد غير ربنا واولادى

 

مفيش حاجة فارقة معاها حاولت ارجعها ذى زمان رافضة قولتلها هصلح من نفسي قالتلي انا مش عارفة ارجع ذى زمان انت دمرتنى..

بقيت عصبية اوووى بتقول كلام صعب مكانتش كدا نهائي مبقاش يفرق معاها حد حتى اهلي بقت بتعاملهم من بعيد لبعيد لانهم اثروا معااها كتير وهى كانت بتتحملهم مفيش حد فارق معاها غير ولادها مش بتخليهم محتاجين حاجة ولما بزعل حد فيهم بتزعل علي زعلهم

هى قربت اكتر لربنا وبقيت اسمعها في الليل تدعى وتعيط ان ربنا يعوضها بحد غيرى وانها مش قادرة تتحمل وتعبت … اتصدمت انا عملت ايه لكل ده ولو فعلا عملت طيب ربنا بيسامح هى ليه مش عايزة تسامح ما انا بحاول اتغير واراضيها …

نفسي ارجعها زى زمان مش عارف …

هى بتخدمنى بس انسانة من غير روح ممكن بدون تجريح قولولي اعمل معاها ايه هل اطلقها وارتاح ولا ايه الممكن يصلحها…

في حاجة كمان عايزة اسال فيها انا كان عندى بوادر تعب قبل زواجى منها والتعب ده ممكن ياثر علي العلاقة الزوجية ومقولتلهاش قبل الزواج اعتقاد منى ان الانسان ميعلمش الغيب ..

وبعد الزواج التعب اتكرر عليا وزاد واثر علي العلاقة الزوجية ما بينا خلفت اولادها في سن العشرينات وانقطعت العلاقة بينا من بعدها وبصراحة هى اتحملت ومتكلمتش قليل لما كانت بتلمح وكنت بتهرب منها .هل عليا ذنب ادام ربنا والهى المفروض تتحمل عشان ده واجب عليها

ممكن رد بدون تجريح

 

رد بريد قراء بوابة العاصمة

استنزفت طاقتها كلها وجاي تشتكي انت تفضل تلوم نفسك

هي قدمت كل حاجه كان نفسها إنك بس تقولها كلمه شكر تحسسها بوجودك للأسف اما ضاعت منك انت فوقت وده حال كل واحد ضامن حد في حياته انه مهما يعمل فيه ضامن وجوده للأسف الطاقه بتخلص وبتوصله انه يكره نفسه

الله يعينك على حالك انت رصيدك خلص عندها

اركن بقا على جنب وسيبها وعيش فى البيت زى الضيف

دا اكتر حل مناسب لك

يعنى ما تخلهاش تحس انك موجود حتى

دا الطبيعى لك