أنواع الشوربات فى العالم

إيمان العادلى

الشوربة طبق رئيسي في كل مطابخ العالم تلاقي الشوربة مفرد ليها صفحات ..

هنبدأ بالمطبخ الغربي ..

في إنجلترا مشهورة جدا شوربة ماليجاتواني ودي بيقول ان أصولها هندية بس هي في الهند بتتعمل بالماسالا أكيد، وبتبقي مرهقة شوية ..لونها أصفر مريب كده

عكس بتاعة الإنجليز اللي يقف فيها الحمص شامخ كده زي تاج الملكة إليزابيث..

في فرنسا شوربة البصل دي مقدسة ، بغض النظر عن الطريقة أنا إيمبوسييبل بالفرنساوي برضه اشربها دي، آخري هاكل حتة التوست اللي بتتحط فوقها ..بصل قال ..فلاحين دول ولا إيه

في أسبانيا شوربة جازباتشو، في إيطاليا شوربة مينستروني، شوربة فاصولاد في اليونان ، شوربة كلودوفيرد في البرتغال، شوربة مانهاتن الكتوم شاورد في الولايات المتحدة ..

هنطير علي اليابان الشهيرة بشوربة الميسو، والميسو هو مادة تنتج عن تخمير الصويا أو الشعير بس غالبا بتتعمل بالصويا..

الصين منهم لله مش مشهورين بشوربة الخفافيش لأ..شوربة كل اللي داقها قال انها لذيذة جدا اسمها هوت آند ساور..

عليهم وعلي الساور في ساعة واحدة

تركيا ليها عالم لوحدها في الشوربة، فيه شوربة الزفاف التركية ودي شوربة طماطم بتتعمل للعروسة ليلة الفرح تمنيا لها بحياة سعيدة ..طماطم وليلة زفاف

فيه شوربة الكستناء بتتعمل بخضار وطبعا معاها الكستناء، دي اللي بنسميها احنا أبو فروة .

فيه شوربة الملفوف وهو الكرنب الشهيرة في منطقة البحر الأسود وهي أكلة مفضلة للنباتيين.

شوربة مرتفعات ميدروز

منطقة البحر الأسود برضه ودي مريبة شوية لبن ورز وبيض

شوربة الأمعاء ودي بتبقي من أمعاء الحيوانات وتقيلة في الطعم وغير مفضلة ولكن تظل من أكلات المناطق الأكثر فقرا، ربنا يغني الجميع .

شوربة لحم الغنم

لحم غنم ولسانها لازم في الشوربة، والمحل اللي يقدمها بيحط رأس المعزة في الفاترينا زيادة توكيد ..فلاحين فلاحين ما فيش كلام.

المغرب مشهورة بشوربة الحريرة و دي أصلها أندلسي الجزئر شهيرة بشوربة الفريك برضه ، السعودية مشهور في منطقة الحجاز شوربة الجريشة أو شوربة الحب الأمريكي اللي هو قمح أبيض بعد تقشيره ..

العراق شهيرة بشوربة الموزات، وبلاد الشام شوربة الفريك.

في مصر احنا مشهورين بالشوربة العادية بعد سلق اللحمة او الفراخ، فيه شوربة لسان العصفور ، والأكتر شهرة شوربة الكوارع وحسبي الله ونعم الوكيل.

بنتشابه عموما كدول عربية في الشوربات دي مع إضافة هبابير من اللحم وأصناف خضار كتير ..

الشوربة عموما بتنقسم إلي تلات أنواع وتلات طرق في إعدادها :

شوربة شفافة زي بتاعتنا العادية دي بعد سلق اللحمة أو الفراخ

شوربة بيوريه ودي بتبقي أتقل شوية وبتنتج بعد عملية سلق خضار زي شوربة العدس والبطاطس

 الشوربة الكثيفة اللي بيتضاف لها مواد تتقلها زي الكريمة

شوربة طماطم..بطاطس..عدس ..شوفان ..قرع ..فطر ..ذرة خضار مشكل مع لحمة أو فراخ في ناحية ، علي الجانب الآخر يتربع طبق مميز جدا هو شوربة فواكه البحر من جمبري وكابوريا وبقلاويظ وسبيط وسمك فيليه ..

اللي اتلسع من الشوربة ينفخ في الزبادي، موروث شعبي أهو نتج عن أهمية تاريخ المطبخ ، بس كده ..أبدا

، ده فيه نظرية علمية اسمها الشوربة أو الحساء البدائي ودي من نظريات تفسير أصل الحياة

بيقولك الأرض كانت في الأول عبارة عن حمم ومواد كيميائية تفاعلت واختلطت ونتج عنها..شوربة قصدهم محلول أشبه بالشوربة سموه

الحساء البدائي

Primordial soup

وبعدين بقي فيه كلام عن الأحماض. الأمينية وبناء الخلية وتطور ال DNA

وظهور الكائنات ..