أكلات مصرية

إيمان العادلى

لو دخلت اي بقالة غالبا هيبقي من ضمن طلباتك جبنة رومي، زي ما كل المصريين بيسموها الا الاسكندرنية اللي بيسموها جبنة تركي

الغريب بقي انها مش تركي ولا رومي
ومعرفش ليه بننسب الجبنة دي للبلدين دول.

هي عموما مصري واختراع مصري صرف.
واللي سافر برة هيكتشف انها مش موجودة في السوبر ماركت (الا نادرا يعني ومن انتاج شركات مصرية)

هتلاقي كمان عندنا نوع من الجبن شديد الملوحة وبيعتمد علي التخزين فترات طويلة نعرفه بإسم الجبنة القديمة (او المش) وده اكل مصري صرف يكاد يكون مش موجود في حتة في الدنيا. والمش ده بيتعمل في الاصل من نوع اخر من الجبن معدوم الملح تقريبا اسمه القريش. الجبنة القريش دي برضه اختراع مصري!
في اهلنا في الفلاحين بيعتبروا المش والقريش هما (ستر البيت) طالما موجود من خزين يبقي مانقلقش. ستر البيت ده جمبه نوع تاني ولكنه سكر هذه المرة. هو العسل الاسود. اللي بيعد هو الاخر من الاختراعات المصرية الصرفة!
كل ده اكل مصري صرف، زي بالضبط الفسيخ اللي ورثناه من ايام الفراعنة. والطعمية (اللي الاسكندرنية بيستعملوا الاسم القديم ليه وهو الفلافل)اللي ورثناها من ايام الصيام المسيحي الكبير في القرون الميلادية الاولي. طبعا الفول معروف في اماكن كتير بس في مصر طريقة (التدميس) طريقة خاصة بنا، اما الزيت الحار فهو اختراع مصري صرف!
طبعا الفلاحين زمان كان من مظاهر العز عندهم انهم يعملوا فطير مشلتت، لانه بيعطي طاقة وقوة بدنية مهولة تساعد علي اعمال الزراعة في الغيط، الفطير المشلتت ايضا اختراع مصري صرف!

طبعا الكشري اكل مصري، والمشبك اختراع مصري، والرز المعمر اكل مصري والملوخية اكل مصري

العالم بيتخانق علشان ينسب لنفسه الاكل، لان الاكل ببساطة ثقافة (علشان كدة لما بتسافر اي مكان بيبقي من المزارات الاساسية انك تاكل اكل البلد دي)

وكل مكان الاكل بتاع البلد منتشر اكتر، كل ماكان ثقافة البلد مؤثرة ومنتشرة اكتر، قوتها الناعمة منتشرة اكتر!

احنا بقي في مصر

بنسمي اكلاتنا بأسماء زي بلح الشام والجبن الرومي (وهي حاجات مصرية) ده احنا كمان بننقل ملكية اكلاتنا لدول تانية اصل المشبك شامي، واصل الكشري هندي

عارف بقي اللي مش اكلنا واحنا استوردناه فعلا هو ايه ؟!
الفراخ….!

لو بصيت علي كل النقوش الهيلوغريفية هتلاقي النقوش ل بط او ل وز، ودي الطيور الداجنة في مصر القديمة (اكل اجدادنا) وماعرفناش الدجاج الا مع حروب الحيثيين وسيطرة ابن مصر البار رمسيس الثاني علي الشام. عرفنا وقتها الدجاج انه نوع رخيص من الطيور الداجنة
ولذلك فضل الي اليوم دلالة الخير في الفلاحين انك تاكل بط او وز!
علشان كدة يقولك…. متنعم في العز وأكل الوز!