أفتاكسات زوج محظور

 

 

إيمان العادلى

 

الحلقة الثانية والأربعون

 

(الجزء الثانى ) أفتاكسات زوج صايم

 

إلهام وممدوح

 

إلهام وممدوح مبيتهدوش ولا من الخناق مبيشبعوش ولا

أقولكم نشوف ٠٠٠٠

 

إلهام : كده يا ممدوح عاوز تضربنى إهئ إهئ على أخر الزمن

 

ممدوح : أنااااا برضه ولا أنتى بستفزينى وتقوليلى غز وأخرة خدمتنا و ٠٠٠٠٠

 

خالد : يا نااااس أبوس راسكم أهدوا شوية حرام عليكم عاوز أتكلم

هاتى راسك يا ماما اهو بوسة أموووواه

حقك علينا يا ست الكل

ممكن بقى تعملى لنا كوبيتين شاى من إيديكى الحلوة دى على ما أتكلم مع بابا

 

إلهام : اه يا خويا إضحك عليا ببوستين وكلمتين حلوين ما أنت زي أبوك كلام وبس

 

ممدوح : شفت يا خالد أهو هى بتجر شكلى أهيه

 

خالد : خلاص يا بابا ( أنت العاقل برضه )

 

ممدوح : ماشى يا حبيبتى حقك عليا إعملى لنا كوبيبتن الشاى علشان أشوف إبنك ده

 

إلهام : حاضر يا دوحة من عنيا ( ياسلام على طيبة قلبك يا إلهام)

 

خالد : الحمد لله السلام عم أرجاء المنزل

 

ممدوح : نعم يا أخويا

إخلص يا واد يلا وقولى عاوز أيه

 

خالد : شوف يا حبيبى أحنا حنشترى سيارة أهو مقلتش عربية علشان الحساسية أللى عندك

 

ممدوح : ها

 

خالد : حنجبها بالقسط من بنك ناصر بيقدم قروض لكده والضمان عندك يا بابا محل البلاى ستشن او الارض اللى أنت شاريها

 

ممدوح : عال عال ده أنت دارس الموضوع كويس ومجهز الملف اهو

انا مش موافق يا سى زفت وأرتاح بقى

ده اللى ناقص كمان عربية وأقساط هو أنا عارف أأكلكم من كورونا الزفت دى ولا أصرف عليكم

يا أبنى أنت مش حاسس بحاجة ما أنت زى أمك بتاكل من أتية محلولة

 

إلهام : مين بيجيب سيرتى ها

إدى الشاى أهو وانا داخلة المطبخ

وحغزى الشيطان

 

خالد : خير ما عملتى يا ماما

بص يا بابا يا حبيبى أنت مش حتدفع أقساط ولا حاجة

 

ممدوح : نعم يا أخويا إمال ايه حناخدها ونهرب

 

خالد : لأ يا بابا حنعمل بيها مشروع حنشغلها أوبر وندفع منها أقساط الشهر للبنك والباقى ينفعنا وانا دارس المشروع كويس وحسبته بالساعة وحشغلها كام شفت وكده

ما هو يا بابا لو تهدى شوية حشرحلك الموضوع بالورقة والقلم

 

ممدوح : إمم هو مشروع كويس فى اليومين الهباب دول

أول مرة تفكر صح يا واد

 

خالد : إحم إحم شفت بقى يا بوس وأنت هادى حلو إزاى

 

ممدوح : مبدئيآ أنا موافق لحد ما أدرس الموضوع من جميع الجهات

 

خالد: حبيبى يا بوس يا قمر انت حجهزلك كل الاوراق وحعملك دراسة جدوى للمشروع كله

 

ممدوح : دراسة جدوى كمان ( ده بين العيال كبروا فى الحظر وأنا مش دريان) هيييج

 

رهف : بابا يا بابا

 

ممدوح : ايه داخلة زى القطر كده ليه من غير صباح الخير حتى

( طالعة لأمك مندفعة )

 

رهف : صباح الخير والسعادة

وحطنش على الجمله الأستهزائية اللى قلتها لنفسك ها

 

ممدوح : طيب

 

رهف : يرضيك يا بابا بنتك حبيبتك تبقى أقل من صحابها ويغيظوا فيا

 

ممدوح : ليه عاوزة عربية أنتى التانية

 

رهف : لأ مش طموحاتى خالص

انا طموحاتى أكبر من كده عاوزة أشرفك يا حبيبى وأحقق لك أمنياتك

 

ممدوح : ومال أمنياتى وصحابك

 

رهف : بص بقى صحابى حولوا لإمريكن وأنا عاوزة أحول زيهم

 

ممدوح : يا لهووووووى يا أنى من عيالى والحظر وكورونا

محدش يمسكنى ولا يحوشنى

تعالى لى هنا

 

أستنونى بكرة ونشوف ممدوح عمل ايه