أفتاكسات زوج صايم
إيمان العادلى
الحلقة العشرون
إلهام وممدوح
إلهام : البطارخ يا دوحة تضربها فى الخلاط ليه
حرام عليك يا راجل ده أنا مستنياها من أول رمضان
يا لهووووى يا أناااا على أفتكساتك
طيب أسألنى شور عليا
ممدوح : فى أيه يا إلهام هو أنا عملت جريمة يعنى
ما الشيف شربينى عمل كده بس هو ضرب الرنجه الصراحة يعنى وأنا بقى حطيت تاتشاتى الممدوحية وعملت البطارخ
بطلى زعيق ولما تدوقى أبقى أحكمى
إلهام : يا حبيبى يا عمرى البطارخ دى تتاكل كده بحالها والواحد يحس بيها وهى بتقزقز كده فى بقه مش تقولى ضربتها مع الطحينة وبقت عجينة فى بعضها
يا عينى عليكى يا إلهام من أفتاكسات جوزك وعمايله
ممدوح : يوووة بقى أفضلى ولولى كده وفتحى عيون العيال أنها وحشه علشان مياكلوش وتسدى نفسهم ما أنتى كده غاوية تنكدى علينا
إلهام : أنا برضه أللى بنكد عليكم يا ممدوح
اقولك أنا اللى ضربت البطارخ وعجنتها حلو كده أرتحت
خالد : فى أيه يا ماما أنتى وبابا صوتكم طالع على السلم
هو أنتم كده علطول حتى فى العيد
إلهام : معهلش يا أبنى الكورونا و الحظر وعمايله مع أبوك نصيبنا نتحمل
إدعى لنا يا أبنى يزيح الغمة دى
يمكن دعوتك تتقبل
ممدوح : أنتى بتدعى عليا يا إلهام وبتقولى للواد يدعى كمان
ده أنتى بقى ناوية على نكد مفتوح ( أوبن داى ) كده
إلهام : ما هو مفيش فيك فايدة طول عمرك كده نيتك سيئة ودايمآ ظالمنى إهئ إهئ
ممدوح : أيوووة وبتعيطى كمان يعنى تدعى الدعوة عليا وتعيطى
ده الستات دى ملهاش حل والله
إلهام : إهئ إهئ انا بقول ل خالد يدعى يزيح الغمة اللى هى كورونا علشان الحظر يتفك و ٠٠٠٠٠
ممدوح : كملى كملى وترتاحى من قعدتى فى وشك ليل نهار مش كده
خالد : يووووة وبعدين معاكم بقى هو انتم مبتتعبوش
كفاية خناق بقى
حقك عليا يا بابا وحقك عليا يا ماما
النهاردة عيد
خلاص يا بابا ماما مقصدتش اللى وصلك
إلهام : قول لأبوك أللى دايمآ ظالمنى وحاططنى فى دماغه ولا فارق معاه عيد ولا غيره
ممدوح : خلاص حصل خير وسامحتها
إلهام : نعم نعم تسامحنى على أيه إن شاء الله
هو أنا أللى ضربت البطارخ فى الخلاط
خالد : البطارخ بخ
إلهام : أه أفتاكسة أبوك بتاعة العيد
رهف : سلامو عليكم ياقمرات أنا جيت
ايه مالكم مقطعين بعض ليه هههههه
ممدوح : مفيش يلا غيرى هدومك وتعالى نتغدى
إلهام : أه تعالى وأنتى تعرفى مقطعين بعض ليه
السفرة جهزت والأكل أتحط
الرنجه والفسيخ جاهزين والطحينة كمان وأفتاكسة ممدوح البطارخ المضروبة
خالد ورهف : واووو يا بابا البطارخ تجنن كده
تسلم إيديك وتفانينك
ممدوح : بجد يا ولاد عجبتكم
قولوا لأمكم اللى منكدة عليا من الصبح
إلهام : تسلم إيديك يا حبيبى طعمها تحفة وجديد
ممدوح : تسلمولى وبكرة بقى حعملكم أختراع جديد
أستنونى بكرة ونشوف يوم جديد
مع إلهام وممدوح
