.
.
اليانور روزفلت = جيليان أندرسون
بيتي فورد = ميشيل فايفير
ميشيل أوباما = فيولا دايفيس
.
.
٣ من أهم وأبرز نساء البيت الأبيض
٣ قصص ل ٣ نساء من عصور مختلفة
الرابط بينهم إن كل ست فيهم كانت (صاحبة رأي)
صاحبة فكر ، صوتها عالي ولا تقبل إنها تنساق ورا (المفروض) أو (المعتاد) ….
كل واحدة فيهم عنها شخصيتها ،
كل واحدة كانت صاحبة حلم ورؤية متقدمة عن الوقت اللي هي عايشه فيه …..
بس الأهم إن التلاتة مارضخوش !
ولا قبلوا يتقالهم ان ادوارهم محدودة في كونهم (وردة) في بيت كبير عشان (المظهر) …………..
في الحقيقة بعد مشاهدتي ل ٤ حلقات من المسلسل اللي showtime انتجته (وهو لسه مستمر في العرض والحلقات تتوالي) ماقدرش اخفي أولًا اعجابي الشديد بالشخصيات ال ٣ اللي تم اختيارهم …..
هل تعلم إن الجملة الأشهر في خطاب فرانكلين روزفلت كانت اليانور هي اللي قايلاله عليها
The only thing we have to fear , is fear itself
وإن هي الشخص الوحيد اللي وقف جنب زوجها لما قعد على كرسي متحرك والكل قال خلاص مستقبله السياسي انتهي بما فيهم والدته …. هي اللي وقفت وشجعته وساندته …. (مع العلم إنه كان خانها وعلاقتهم الزوجية شبه منتهية على الرغم من استمرارهم فيها) !!
انها ومن سنة ١٩٠٥ كانت بتتكلم في التجمعات عن حقوق الإنسان وحقوق المرأة والحق في التصويت ….
عن الرأي وعن (الست)
وجملتها الشهيرة “الستات عاملين زي كيس الشاي ما بيبانش قوته غير في المياه الساخنة”
.
.
بيتي فورد (اللي هي في الحقيقة الأكثر أثارة بالنسبالي)
شخصية ثرية بشكل مدهش ،
بعد قرارها إنها تتطلق من زوجها الأول اللي كان بيسيئ ليها وبعد ما الكل قالها ان مافيش ست عاقلة تتطلق لانه ببساطة ماحدش هيبصلها ،،،
اخدت القرار ، اشتغلت وعاشت حياتها ،،
ثم اتجوزت جيري فورد ،
كانت راقصة وكان نفسها تكمل بس مانفعش ،
وبعد فترة تعبت نفسيا وراحت لدكتور نفساني في وقت ماكنش متعارف عليه بل بالعكس كان وصمة ،،
لكن هي مافرقش معاها ، وطلعت اتكلمت عن دا ،،
عن المرض النفسي وعن تأثيره وعن قيمة الطب والعلم ،،
ولما جالها سرطان ثدي واضطرت انها تخوض المعركة وتعمل العملية اتكلمت عن دا بصراحة وشاركت الجميع الرحلة عشان هدف واحد “التوعية” بضرورة الكشف المبكر ….. دا في الستينيات والسبعينيات
سيدة (غنية) جدا وفي الحقيقة هي الأقرب في القصص لقلبي ….
.
.
ثم ميشيل أوباما … The Boss !
المحامية الشاطرة اللي اتعلمت وسعت صاحبة الشخصية القوية واللي كانت في مرحلة معينة “مديرة” أوباما في شركة المحاماة اللي كانوا فيها
وتظل واحدة من أهم الاسباب اللي صنعت نجاح هذا الرجل ……
.
.
بس الأهم “أنهم كلهم” كانوا السبب …. !
النساء دول صنعوا نجاح هولاء الرجال
فرانكلين روزفلت
جيري فورد
باراك أوباما
.
.
وكل ست من دول كان عندها قضية ، من حقوق الإنسان للصحة ، للتوعية بالأمراض المختلفة ونبذ العنصرية في وقت كان (صعب) ، في وقت العنصرية كانت هي (العادي) !!!!!
.
.
جيليان اندرسون في دور اليانور روزفلت (مخيفة لانها هي بكل التفاصيل)
فيولا دايفيس في دور ميشيل أوباما (هي عملاها صح بس فيه حاجة ناقصه 
لكن الأعظم ……
اللي متألقة بشكل مخيف ميشيل فايفر في دور بيتي فورد ، عظيمة !!!!!!!!!!!!!!!!!
العمل اللي اشتغل عليه اسماء معروفة على رأسهم المخرجة والكاتبة سوزان بيير اللي عملت اعمال كتير ابرزهم واحبهم
Things we lost in the fire
After the wedding
The undoing
ممتع جدا ….. و(مهم) ……..
من المفترض ان الموسم الأول ١٠ حلقات تم عرض ٤ منهم
The First Lady 2022
Highly recommended
#لياليروروالتليفزيونية
