ياريت يافندم تنزل مشكلتي بدون أسم من فضلك أنا متزوجه من حوالي ٨ سنين و معايا ولدين الاول سبع سنين

والحقيقه معظم المشاكل بيني وبين والده علشانه

هو طفل عنده فرط حركه والنوع ده من الأمراض

بيبقي الطفل دايمآ بيعاني من حاجات كتير زياده عن

الطبيعي يعني انفعالاته زياده حركته زياده متهور

شويه في تصرفاته رغاي أوي

حتي وهو بيبي لسه مولود كان لما يحتاجني يصرخ صريخ

مش طبيعي اعراض الفرط ظاهره من يوم ولدته تقريبآ

والفرط عنده وراثي واخده من جده أبو جوزي

 

المهم الدكتور نصحني اني لازم أكون هاديه معاه

علشان عصبيته تهدي وفعلا ده اللي حصل وبدأت

استوعب المشكله اللي عنده وادخل علي ڤيديوهات

لعلاج الفرط بإنه المفروض يلعب رياضه وطول الوقت

ألهيه في حاجات وبالفعل عملت كده والولد فعلا كان

أفضل لكن المشكله ان باباه دايمآ مش مقتنع بأي

حاجه بعملها

حاولت أودي الولد حضانه عمل معايا مشكله وخلاني

قعدته وديت الولد تمارين عمل معايا برضه مشكله

ومارتحش الا لما قعدته حتي أنه يحفظ قرءان شايف أنه

مش أساسي وإني ممكن أحفظه في البيت وللعلم ابني

داخل مدارس أزهري

هو أخره يوديه مدرسه اللي بتبقي شهرين تلاته في

السن وبقيت الشهور مفيش حاجه طبعآ

 

اعصابي تعبت جداااا من الخناقات والمناهده وللعلم

هو بيقبض كويس مش وحش والولد دخلته مدارس

حكومي مش خاص ورغم كده دايمآ بيشتكي من

المصاريف

وهو اللي ماسك مصروف البيت ومش راضي انا اللي

أمسكه خااالص تقريبآ انا ماليش أي سيطره في أي حاجه

في البيت هو اللي بيجيب كل حاجه ولو طلبت حاجه

يقولي ديه مش اساسيات

انا ماعنديش مشكله في أي حاجه انا كل مشكلتي

عيالي اللي حاسه أنهم بيتظلموا وابنه اللي بقي بيجيله

كوابيس كتير من كل الضغوطات

وطول مانا بقول نعم وحاضر احنا كويسين لكن لما

اتعرض واقول المفروض العيال يروحوا ويعملوا بيقلب

للأسف وحتي الطلاق مش راضي يطلقني خالص انا

نفسيتي تعبت لدرجه اني حاسه اني محتاجه لدكتور نفسي يديني مهدئات والله العظيم

 

 

رد بريد قراء بوابة العاصمة

للاسف الزوج هو اللى محتاج علاج مش الطفل

ممكن علاج فرط الحركه من البيت زي انك تعملي بعض الانشطه البسيطه فى البيت

زي التلوين – القراءة – نط الحبل – مجموعه كور ملونه وكل كره يتحطها فى الكرتوه نفس اللون – اشتريله عجله يلعب بيها فى الشارع قدام عينك ويقضي بيها المشاوير القصيرة – اطلبي من الولد يساعدك فى البيت

 

كل دي حاجات هتفرق معاكي ومش مكلفه ولا محتاجه مجهود منك

بالتوفيق