نصائح العاصمة
إيمان العادلى
_ العيش الفينو قبل ماتعمليه سندوتشات شيلي القلب واقطعي الحروف وحمصيهم واطحنيهم ضيفي عليهم توم بودر وبصل بودر وبابريكا وملح وفلفل ونشا وبيكنج بودر
للبانيه والفراخ المقرمشة
_ الباذنجان المخلل ضيفي بقدونس مفروم مع التوم بيدى طعم جميل
_ البشاميل ضيفي جبنه مثلثات او كريمي وجبن رومي مبشورة بس، بكميات بسيطة هيفرق في طعم البشاميل
_ ملعقة سكر في صلصة المكرونة عشان متعملش حموضة
_ البطاطس قبل ماتحمريها اسلقيها عشر دقائق في ميه وملح بتقرمش ومش بتشرب زيت
_ قشر الليمون مش ترميه خليه عالحوض بعد ماتغسلي المواعين ادعكي بيه ايديك بيشيل السمار من صابون المواعين وبينعم الايد
_ محشي الكرنب سخني حته زبدة وحطيه عليه قبل ما يتشرب بشوية عشان يبقى بيلمع وطعمة جميل
_ عسل في تتبيلة الفراخ المشوية بتدى طعم حلو _ زبادي في تتبيلة البانيه بيخلية طرى ومستوى كويس
_ البتنجان المحمر خليه وهو سخن واقفلي عليه العلبه عشان يطلع طرى مش ناشف
_ ادعكي الفراخ ببصلة وملح وفلفل قبل السلق عشان يبقى ليها طعم وريحة ومتبقاش زفرة
_ اكياس الشاي مترميهاش سقعيها وحطيها علي عينك للاجهاد والهالات السودا
_ الرز باللبن ضيفي كيس كريم شانتيه هيخلى الطعم جامد وزى بتاع برة بالظبط
_ رشي دقيق وملح علي بصل الكشري قبل التحميرعشان يكون مقرمش
_ رشة زعتر علي صلصة المكرونة بتدى ريحة حلو وطعم مميز
_ بيكنج بودر علي عجينة الكفته المشوية ميخلهاش تكش وتكون منفوشة زى ما هى
_ تشوح اللحم في الزبد وحبهان وورق لورا قبل السلق نديها صدمة عشان يبقى لونة بنى وجميل مش بيضة
_ الرز الابيض شوحي مستكة وحبهان في السمن قبل الرزهيدى ريحة حلوة لرز
_لاحلي صلصة مكرونة اضربي مع الطماطم توم وفلفل رومي وفلفل حامي
_ إدهني الفراخ والبط بكاتشب وملح وفلفل وقرفة قبل ما تحطيها فى الفرن هيخليها لونها حلو
_الحمام المحشي 30 دقيقة بعد غلي الميه لسلقة
_ حشو الجلاش موتزريلا مع العصاج
_ الرز البسمتي اكشفي الغطا بعد ما يستوي عشان يبقى مفلفل ميعجنش
_ وانتي بتقلي البانيه حطي ملعقة زبدة مع الزيت هيبقي زي المطاعم
