ملخص الانثى الشرقيه ..بقلم إيمان الوكيل

بقلم ..إيمان الوكيل

كان سنى خمسه ؛ لما ابويا قال عيب
لاتردى كلمه ولا تفتحى عين

على سبعه؛ امى قالت
شوفى اخواتك.. واغسلى المواعين

عمى شخط وانا ؛ تسعه
لمى شعرك…. وبلاش مونيكير

وع الحداشر؛ صرخت وبكيت
لما جدى امر …بلاش بناطيل

ومن اتناشر؛ لا تروحى ولا تيجى
الضحك عيب …ماتهزريش
هيقولوا سايبه …ومالها كبير

وزهق الخمستاشر ؛ اولها ….مفيش مونيكير
واقفه ليه؟ .. قاعده ليه ؟….حتى الفكر … حجروا عليه

لاتلبسى الاحمر … لاعقد ولا خلاخيل
لما تكبرى.. اعملى اللى نفسك فيه

وفرحت بنفسى ع ؛ العشرين

قالوا عيارك فلت فرحانه ب مين
لاتكونى بتحبى… استغفر الله العظيم

اللى تحب تكن من الخاسئين
اتجوزى وعيشى ..ماكلنا عايشين
هاتى عيال لا يفرحوا فيكِ ويقولوا عقيم

وف التلاتين ؛ قلت ارتحت

لا اخ يتأمر.. ولاخال يقول عيب
جوزى قال لا… الست ست ولو تسعين

أمرى نافذ ..لو غضبت يلعنك ملاكين

و سألونى بسخافه ..لابسه احمر ليه
عمرك اربعين؛ بنتك عروسه.. وابنك ملو العين

قلت كفايه… انا عارفه الغلط والعيب
ومين يتكلم وانا ف الخمسين ؛
رد ابنى : وانا رحت فين