مساء الخير واعذروني عالتفاصيل الكتير قدامي قرار مصيري اني ارجع لطليقتي او مرجعش وحابب رأيكم. 

 

أنا مغترب في أواخر الثلاثينات. تزوجت من كام سنة بنت جميلة خلوقة من أسرة محترمة كنت مسافر في فتره الخطوبة والتواصل كان شبه منقطع من ناحيتها. كنت ديما بحاول اتواصل واتصل وابعت مسجات بس هي كلامها كان قليل جدا.

بعد الجواز لاحظت فيها نوع من البعد والبرود وقلت لنفسي انها لسه مكسوفه. يعني تديني حقوقي بس ترفض اي محاولات تانيه للقرب لدرجه انها كانت ترفض اخرجها وافسحها.

مع ذلك حبيتها واتعلقت بيها وخليتها محور حياتي خاصه انها كانت اول ست في حياتي. حملت وتحول برودها لنفور واضح وصريح، وكانت تبرر انه بسبب الهرمونات والحمل. بعد ولاده بنتي لقيتها بكل اسف ترفض ترجع معايا للبلد اللي كنت عايش فيه وتطلب الطلاق. كانت صدمة ليا عمرنا ما اتخانقنا أو كان فيه سوء عشرة بيننا، انا حتى كنت التمس لها العذر في البرود واقول بكره الدنيا تبقى احسن بيننا. لكن قالتلي انها اصلا مغصوبه عليا ومش عاوزاني. طبعا طلقتها ولميت هدومي وسبتلها الشقه كلها وسافرت لكن فضلت على تواصل معاها في الامور اللي تتعلق ببنتنا وكنت انفق عليها وعلى بنتي بالحسنى.

كنت بنزل الاجازات اقعد عند اهلي وازور بنتي ولما اشوف امها انبهر بيها كل مره زي ما تكون اول مره اشوفها ف حياتي. حاولت كتير انساها معرفتش. حاولت مره بعد سنتين من الطلاق اكلمها تاني في رجوعنا لاقيتها قفلت الموضوع بقسوه مش مبرره. قررت بجد انساها تماما واركز على نفسي وشغلي واشوف نصيبي.

الحمدلله ربنا كرمني واترقيت مرتين في خلال 5 سنين فقط وقدرت اجيب شقه تانيه في مصر في حي يعتبر كويس ومادياتي كويسه والصراحه الشغل كان واخد كل وقتي كنت بشتغل ليل نهار فمكنش فيه فرصه ادور على بنت الحلال. من كام شهر هديت الاوضاع في الشغل مع الترقيه الاخيره وقررت ادور على بنت الحلال ولقيت ست من سني ومناسبه ليا من كل ناحيه مطلقه بدون ولاد وخطبتها.

ومن اسبوعين بالضبط نزلت مصر وخدت بنتي افسحها وجات امها معاها (بالعادة مش بتيجي معانا). المهم قاعدين بنتكلم عادي عن شؤون البنت والحياه لاقيتها تعرض عليا نرجع لبعض. أنا كنت قفلت الباب دا تماما لاني فقدت الأمل فيها وقلتلها الكلام دا وفكرتها باللي عملته اخر مره حاولت اكلمها فالرجوع قعدت تعيط وتعتذر. سالتها مين غصبك عليا دا كان سؤال رفضت تجاوب عليه خلال السنين دي كلها بس كنت متوقع الاجابه لاني اساسا ابن خال مرات ابوها وفعلا زي ما اتوقعت اعترفت ان فعلا مرات ابوها غصبتها واخواتها من ابوها ضربوها وهددوها وانها حاسه نفسها وحيده مالهاش حد (امها وابوها متوفيين وعاشت مع مرات ابوها واخواتها من الاب) وان السبب الوحيد انها مكنتش متقبلاني عشان انا قريب مرات ابوها وشايفاني جزء من العذاب اللي هي كانت فيه وحكتلي ازاي بعد الطلاق مرات ابوها واخواتها جم البيت واتضربت منهم لدرجه ان والدتي اللي ساكنه تحتها واخويا جم وطردوهم من البيت انا كل الكلام دا اول مره اسمعه في حياتي ولا امي ولا اخويا حكولي حاجه اصلا (طليقتي لا تزال عايشه مع بنتي في شقتي ببيت العيله يعني عايشه عادي جمب اهلي ومستقله بسكنها). المهم

كلامها قلب حياتي تماما. تاني يوم كلمتها من الصبح قلتلها هسألك سؤال واحد هيحدد نرجع لبعض او لا ولو كدبتي هعرف.. ليه عايزه ترجعي دلوقتى؟

قالت عشان بنتنا اللي لازم تتربى بيننا وعشان السنين دى اللي عاشتها مطلقه في بيت عيله مع اهلي مشافتش لا مني ولا منهم حاجه وحشه ومش هتلاقي احسن مني وازاي لما عرفت اني خطبت وبشطب شقتي الجديده ف القاهره غارت عليا ودا عرفها انها تحبني.

في نفس اليوم رحت بعد المغرب لبيت خطيبتي وفسخت الخطوبه عشان محبتش اظلمها معايا وانا فيه واحده تانيه شاغلاني سواءا هرجع لمراتي او لا.

دلوقتي انا قدام قرار مصيري.. ارجع ولا مرجعش؟

امي تأيد قرار رجوعنا عشان بنتي وعشان تقول مراتي طيبه وخلوقه مشافتش منها حاجه وحشه طول السنين دى بالعكس لما امي تتعب كانت تخدمها حتى بعد الطلاق.

ابويا شايف ارجع ولو لاقيتها تتعنطز وتتعامل ببرود اتجوز واحده تانيه واخد التانيه معايا لدبي وهي تقعد ببيتها هنا.

انا لما افكر بيني وبين نفسي مقدرش انكر اني بحن ليها بس مش قادر انسى التوهان اللي عيشتني فيه والبيت اللي اتهدم فجأه بدون انذار ولا حتى قسوتها اخر مره رفضت فيها نرجع قالتلي بالحرف (واحده محبتكش في يوم واتطلقت منك ولسا بتجري وراها وعايزها). هي طبعا دلوقتى ندمانه وتقول مكنتش قاصده الكلام اللي قالته.

انا عايز اخذ منها ضمانات انها اتغيرت وانها هتعيش معايا بما يرضي الله وننسى موضوع مرات ابوها وكل ظروف جوازتنا الاولانيه بس اعمل ايه؟

اتطمن لها ازاي؟

 

رد بريد قراء بوابة العاصمة

 

هي بس غارت عليك وخافت واحده تانيه تاخدك وتاخد اللي معاك كله وممكن ف يوم وليله تقلبك عليها وتمشيها من الشقه اللي سايبها ليها

فا قالت لا الحق نفسي

بكره هترجع معاك زي الاول ارجع مش هتخسر حاجه بس خد حذرك منها متبقاش مدلوق عليها وكمان الرجوع كويس لبنتك

بس بلاش تقولها ع رأي باباك عشان ممكن تتصنع

خليها بطبيعتها عشان يوم ما تقصر معاك ولا تتعنطز تتجوز فعلا