إندونيسيا فيها بركان نشط ومشهور جدًا اسمه Karaktau موجود في جزيرة Anak Karaktau، والبركان دا بالذّات صاحب سُمعة سيئة في كونه صاحب واحد من أكثر حوادث إنفجارات البراكين دمارًا في التاريخ الحديث في ١٨٨٣ ..
.
الموضوع ساعتها كان بدأ يمهّد من شهر مايو بإنفجارات متقطّعة وهزّات أرضية لحد السّاعة ١ من ضُهر يوم الحد ٢٦ أُغسطس ١٨٨٣ لما ارتفعت سحابة الرماد لمسافة حوالي ٢٧ كيلومتر فالسما، ووصل الوضع لذروته يوم الإتنين ٢٧ لمّا انفجر على ٤ مرات بشكل من أكثر الأشكال عُنفًا وتدميرًا لدرجة إنّ صوت الإنفجار التالت تم تسجيله كأعلى صوت لظاهرة طبيعية في التاريخ الحديث بوصوله لمدينة بيرث في أُستراليا على بُعد ٣١١٠ كيلومتر ومدينة رودريجز في مورشيوس على بُعد ٤٨٠٠ كيلومتر .. ووصفوه بإنه مدفع من سفينة حربية ..
.
الإنفجار التالت دا كان عنيف لدرجة إنّه نفث رماد بإرتفاع ٨٠ كيلومتر ودمّر ٧٠٪ من الجزيرة بكل اللّي عليها وسبب أمواج تسونامي وصلت لأكثر من ٣٠ متر ارتفاعًا في بعض المناطق يمين وشمال، وتم تقدير الطاقة اللّي انبعثت منه بإنّها مُساوية لحوالي ٢٠٠ ميجاطن من الـ TNT أو ٤ مرّات ضعف القنبلة السوڤيتية الأشهر ڤانيا أو تسار بومبا أو EDS-202 اللّي هي أقوى قنبلة حرارية نووية تم صُنعها فالتاريخ ..!
.
عايز أقولك إن الإنفجار مزّق طبلتي أُذن بحّار كان على سفينة على مسافة ٦٤ كيلومتر من البُركان، وموجة الضغط بتاعته تم تسجيلها على باروجرافات أو أجهزة قياس الضغط في جميع أنحاء العالم وبعض الأجهزة دي سجّلت الموجة دي ٧ مرّات على مدار ٥ أيام، ٤ مرات من البركان للجهاز و٣ مرات وهي راجعة للبركان في طريق العودة .. ودا بكُل بساطة معناه إن موجة الضغط دي لفّت المرة الأرضية ٣ مرات ونص ..
.
يكفي إن موجات التسونامي اللّي خرجت بسببه كانت بترجّ السُفن في جنوب أفريقيا وقضت تمامًا على مدينة ميراك بموجة ارتفاعها ٤٦ متر، ومُجتمعة مع الهزّات الأرضية والحمم البُركانية والأمطار الحمضية تسبّبوا في وفاة ما يقرُب من ٣٦٤١٧ شخص ..!
.
كل دا بحاول أوصلّك الصّورة القاتمة والمُرعبة اللّي كان عليها الإنفجار دا وأتمنى تكون وصلت عشان فعليًا الموضوع مُخيف لأقصى درجة، يكفي إن الإنفجار خلّى سماء أوروبا كلّها ضلمة أغلب أوقات اليوم ولعدّة سنوات أظلمهم أول سنة كاملة مإنخفاض في درجة الحرارة لدرجة إنّهم أطلقوا عليها Year with no sun يعني (السنة بدون شمس) ..
.
كدة انت عرفت التّاريخ المُظلم لبُركان Karakau وعيشت واحدة من أحلك الأوقات العصيبة في التاريخ البشري الحديث، اعرف بقى اللّي حصل من كام ساعة ..
.
بركان Karakau انفجر تاني بعمود من الحمم البركانية والرماد والدخان وصل لارتفاع ١٥ كيلومتر في إنفجار من الأعنف فالفترة الأخيرة بصوت وصل إلى چاكارتا على بُعد ١٥٠ كيلومتر، ودا أكثر مرّة نشط فيها بعد إنفجار ديسمبر ٢٠١٨ كانت سبّبت التسونامي الشهير اللّي موّت حوالي ٤٢٠ شخص في چاڤا على مسافة ٣٠٠ كيلومتر ..
.
من رحمة ربنا عالنّاس هناك وعلينا كلّنا إن إنفجار ٢٠١٨ دا طلّع جزء كبير من اللّي جوّاه وقلّل كُتلة البركان بحوالي التلتين فعشان كدة الأثر التدميري المرّة دي مش هيبقى بنفس قوّة قبل كدة والحمدلله إنه مش هيقرّب حتّى من إنفجار ١٨٨٣ اللّي لسّه يُعتبر نقطة سودا في تاريخ المنطقة بكونه الأعنف واللّي مفيش بُركان فالتاريخ الحديث حتّى قرّب يوصله .. يعني الحمدلله دا يُعتبر حاجة هيّنة نظرًا للتاريخ الطويل لبركان سئ السُمعة زيّ دا ..
.
النّاس في إندونيسيا قلبهم وقع في رجليهم وبدأوا يحكوا على تويتر ويدعوا في حاجات شبيهة بـ (كاراكاو إحنا بنحارب كورونا من فضلك نام تاني) و(أنا سامعة كاراكاو من على بُعد كيلومترات بقاله ساعتين متواصلتين والصوت مُخيف) ومناموش طول الليل من الخوف وأكيد مفيش على بالهم غير رُعبهم من تكرار الكارثة القديمة ..
.
مش قادر أتخيّل الناس بتوع ١٨٨٣ كانوا حاسّين بإيه ولا حتّى الناس اللّي قريبين منه دلوقتي دول حاسّين بإيه، البركان هو قوة عاتية من قوى الطبيعة مفيش مخلوق بيقدر يقف قُصادها ومبترحمش حد، حرفيًا مفيش حل غير إنّك تفضل تهرب بأقصى سُرعة وبدري على قد ما تقدر عشان مش بس الخطر في الحمم لا دا في الأمطار الحمضية والرماد اللّي بيصاحب وبيتبع الإنفجارات دي واللّي تأثيره مُميت زيّها بالظّبط ..
