انا هحاول احكي مشكلتي بأختصار بس بجد انا محتاجه رايكم عشان مشتته ومش عارفه مين اللي غلطان فينا

0

انا هحاول احكي مشكلتي بأختصار بس بجد انا محتاجه رايكم عشان مشتته ومش عارفه مين اللي غلطان فينا انا عندي ٣١ سنه سبق ليا الزواج من ٩ سنين وعندي بنت ٨ سنوات تجربتي الاولانيه كانت صعبه بكل ماتعنيها الكلمه من معني اتحملت وحاولت اكمل حياتي عشان البنت بس الحياه كانت مستحيله بينا خلعته واتنازلت عن كل حقوقي من الالف للياء عشان بس اطلع سليمه من الجوازه ديه ومن بعد الانفصال كان عندي تقريبا ٢٤ سنه رفضت تكرار فكره الجواز لمده ٦ سنين واي حد كان بيتقدملي كانت الفكره مرفوضه بالنسبالي في خلال فتره ال ٦ سنين دول كانت كل حياتي شغلي وبنتي بحكم ان طليقي مكنش بيصرف فأنا كنت مسئوله عن بنتي ماديا ومعنويا عشان كمان كان رافع رؤيه ومبيجيش فضلت حياتي ماشيه كده لمده ال ٦ سنين دول. السنه اللي فاتت فقط حسيت ان ممكن ادي نفسي فرصه للي بيتقدموا واكرر تجربه الزواج وفعلا اتعرفت علي شاب محترم طلبني للجواز ووافقت هو مرتاح ماديا جدا واحنا من طبقه متوسطه سألنا عليه وكان الواضح انه مناسب ليا اذا كان في السن او التربيه او المستوي التعليمي وفعلا جه اتقدم هو واهله هو كان منفصل بردوا وعنده بنت وولد عايشين مع مامتهم. اول زياره جه اتقدم فيها واحنا في اتفاقات الزواج قالنا انا مقدرتي في الشبكه ٢٠ الف ومؤخر ٢٠ الف ومش بكتب قايمه والعفش بالنص ساعتها اهلي معلقوش علي اي حاجه عشان هما بالنسبالهم اهم حاجه يكون راجل بيتقي الله فيا ويعوضني عن اللي فات من حياتي مع العلم ان مقدرته الماديه اكتر بكتير من الاتفاقات اللي قالها خلصت الاتفاقات وتاني يوم نزلنا نشتري الشبكه اول موقف كان عند الجواهرجي دخلت انقي الدبله المتوسطه الحجم لا فيه مغاله الشكل الطبيعي للدبله كنت بقيسه الاقيه قلعهالي ويقولي مش حلوه ويدور علي ارفع حاجه في الاول اتصدمتو كنت مبتكلمش وبتفرج واقيس اللي يشاورلي عليه وفي الاخر اقنعني بأخف وارخص دبله موجوده في المحل هيه شكلها حلو مش هنكر بس هو كان قاصد ده قلت مش مهم اهم حاجه تكون عجباني كملت وجبت انسيال ومحبس قالي هتشوفي سلسله قلتله انا مبحبش السلاسل انا فعليا كده بس المفروض يقترح عشان نكمل تمن الشبكه نجيب خاتم اي بديل محصلش واكتفا باللي نقناه وعملوا ١٤ الف ومشينا علي كده لا اتكلمنا ولا قلنا مش ده اللي اتفقنا عليه تاني يوم نزلنا نجيب العفش عشان هو مفروض بيشتغل بره وهيسافر ومفروض نخلص عفشنا ونشتريه قبل مايسافر نزلنا من اول اليوم لأخره تدوير علي العفش مفيش كوبايه عصير جبهالي ولما حسيت اخر اليوم اني تعبانه من اللف طلبت منه نروح نشرب اي حاجه في اي مكان اتحجج انه رايح لمامته في مول عشان عيزاه وروحني تالت يوم نزلنا تاني لباقي العفش في اخر اليوم هو مكنش اتغدا وعرض عليا نروح نتغدا في مكان بصراحه انا كنت شاكه من خلال المواقف اللي فاتت ان فيه بخل في الموضوع وقلت اختبره واقوله اني مش جعانه راح طلب لنا انا وهو طبق واحد فعلا وقالي مدام مش جعانه اتصدمت اكتر وحسين ان الاحساس اللي جوايا بيتأكد بعدها سافر بعد ما خلصنا تقريبا اشترينا عفشي وعفشه سافر علي اساس ٩ شهور وينزل نتجوز في خلال الفتره دي كلنت حياتي كلها تليفونات عدا عليا كذا مناسبه كان بيكتفي انه يعيد عليا فيهم مع العلم ان عنده الامكانيه انه يهاديني حتي وهو مسافر بس مكنش بيحصل حصلت مره في رمضان ومره كنا متخانقين بس وفي عيد ميلادي لقيته بيكلم حد من اهلي وبيقولها انه عايز يهاديني بيجامات بما اني بجهز طبعا اتصدمنا اكتر واحد بعيد عن خطيبته ومبيشوفهاش ولا بيخرجها داخل علي سنه وفي مناسبه زي دي يفكر في كده وبالذات انه معاه مش هقول مثلا ممعهوش انا اسفه طولت عليكوا بس انا حابه احكي بالتفصيل عشان خطوبتي اتفسخت من يومين ومتدمره حرفيا وعايزه اعرف انا اثرت في ايه نسيت اقول ان في خلال ما سألنا عليه وعلي اسباب انفصاله من طليقته سمعنا انه كان حريص وان الراي الاول والاخير لمامته واخته طبعا مهتمناش اوي باللي اتقال وكملنا مشروع الخطوبه. في خلال فتره الخطوبه انا تعاملتي مع مامته واخته تليفونات هيه صحيح مش كتيره بس حسيت من خلالها ان اغلب مشاكلنا هما عرفنها وان مامته كانت بتتقمص مني لاسباب تافهه وهو كان دايما بيشوف ان معاها الحق. اخر خناقه سبنا بعض عشانها هيه الستاير هو من طبعه انه كان لازم يعرف كل حاجه واي حاجه بجيبها في الجهاز ولازم اصورها كالعاده وانا نازله اشتري قماش الستاير صورتله كل الخامات والالوان ومكنش بيعجبه اي حاجه لدرجه ان الناس زهقوا من اللي بعملوا وكنت بستنا يرد عليا عشان اعرف ايه اللي عجبه واشتريه كنا متفقين علي اللون والخامه لقيته غير رأيه وشايف كل حاجه صورتها مش حلوه انا بصراحه اتشتت وعجبني شكل وقلتله هشتريه قالي براحتك مدام ذوقي مش عجبك وفعلا اشتريته واتفقت علي التفصيل والاستلام بمجرد ماروحت قالي انتي بردوا اشتريتيه انتي مبتعمليش حساب لرايي في اي حاجه انتي عايزه انتي اللي تبقي مسيطره مع العلم بردوا ان كل حاجه اشتريتها في البيت كانت ذوقه المهم قالي الستاير دي ترجعيها ومش هتدخل الشقه قلتله مش هينفع طبعا انت بتهزر الراجل قص الستاره قالي وانا كمان مينفعش الموضوع اتقفل علي كده هو مش موافق وانا صعب ارجع الستاير ومامته طبعا هيه اللي متصدره في الموضوع وفسخ الخطوبه هو متمسك بيا جدا لو غيرت الستاير غير كده مش عايز انا فعليا متدمره ومش قادره اصدق ان بعد كل التنازلات اللي عملتها يتدخل في حاجه زي كده ويسمع كلام مامته فيها ويسبني عشانها ارجوكم قولوا رايكم انا غلطت في حاجه انا مش هقدر اعيش من بعده

 

رد بريد قراء بوابة العاصمة

المزيد من المشاركات
1 من 44

لا طبعا مغلطتيش انتي عملتي الصح بدل ما تتجوزيه و تطلقي تاني احمدي ربنا انك فهمتيه بدري وربنا يعوض عليكي

 

 209 مشاهدات العاصمة,  4 views today

اترك رد

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد


Windows Lizenz Windows 10 Lizenz Office 2019 Lizenz Kaufen Office 365 kaufen Windows 10 Home kaufen Office 2016 kaufen windows 10 satın al windows 10 pro satın al
%d مدونون معجبون بهذه: