أنا المغترب
بقلم الأستاذة بن كتيلة فتيحة
هجرت بلادي وناس عزاز عليا .
هذه الخبزة ..والدنيا مادارت فيا
حسبتوني هاني وأنا ربي لعالم بيا
كي نتفكر لميمة تتفجر عينيا
قلبي مهموم لمن نحكي هاذ العشية
عيني طارت في الباب شكون يطبطب عليا
حكمني الضروالسقم واحد ما طل عليا ..
همي زاد وحشي واش دواه.
قلت نروح لبلاد ونشوف التراب والعباد..
تغيب شمس وتشرق شمس …والدقيقة عندي عام..
لميت قشي وشديت الرحال …وقفوتولي يا خاوتي وقلتولي محال
أنتم فيروس وبلادنا ما تقبل منجوس..أنتم حركى وأولاد فرنسا منقبلوش…
طاحت دمعتي جراية بكيت وبكيت كل من حذايا
أنا حفيدت عميروش وعلاه تششفوا فيا عدايا
أنا بنت الأوراس ..كيف نبيع بلادي يا ناس..
أنا بنت الأحرار…انا من جداتها ولدت الثوار…
أنا من يماها دوات الأبطال وباباها طلع للجبال.
لمن حب الغربة ..ولمن قدر يخلي والديه..
يا خاوتي الخبزة مرة…والدنيا فلك من ركبها تديه …
حياة الغرة مرة ….والعلقم تذوقيه …
تجيك المرة وين تتمني تراب البلاد تبوسيه…
أنا ما فضلت الغربة ….لكن قضاء ربي تشوفيه…
أرحمونا من الهدرة المرة قلبي لفيه يكفيه..
منيش نطلب فيكم …جايا لبلادي وراسي نرفعوا فيه…
هذا علم الجزائر بدمي نفديه…
لحبنا نحبوه وفي بؤبؤ العين نخبوه …ولكرهنا ما نكروه نطلبوا ربي يهديه…
اهداء لكل مغترب .
يجب عليك تسجيل الدخول لكتابة تعليق.