أفتاكسات زوج محظور

---

 

إيمان العادلى

 

الحلقة الثالثة و الستون

 

إلهام و ممدوح

 

(الجزء الثانى )أفتاكسات زوج صايم

 

ممدوح قالها كان ليه واقف مع جارتهم سوسو أم شعر أصفر

وإلهام يا حرام كالعادة رقبتها أد السمسة و تعالوا نشوف ٠٠٠٠٠

 

ممدوح : إلهام يا إلهام

 

إلهام : ايوة ياحبيبي صباح الخير يا روحى خير بتنادى عليَّا تأمرنى يا قلبى

 

ممدوح :ايه ده بسم الله الرحمن الرحيم

 

إلهام :مالك يا حبى انت بتبصلى ومستغرب كده ليه

 

ممدوح : أصل من يوم ما اتحظرنا أول مرة أنادى عليكى وتردى على طول من غير ما تنكدى علينا

 

إلهام : انت كنت عاوز حاجة

 

ممدوح : اه جهزيلى الفطار وكوبية الشاى والقميص الكروهات الاحمر فى الأزرق

 

إلهام : أهو يا روحى مغسول وجاهز ومكوى اتفضل

 

ممدوح : والبنطلون الجينز الكحلى والكوتشى الكحلى

 

إلهام : أهه كنت بمسحه والبنطلون أهو أتفضل يا عيونى

 

ممدوح :مالك ياحبيبتى النهاردة انتى عيانه؟

 

إلهام : لا يا روح قلبى انا كويسة بتقول كده ليه

 

ممدوح : مفيش بس مستغرب يعنى عموما عاوزة طلبات من السوق او السوبر ماركت

 

إلهام : اللى تجيبيه يا حبيبي هاته والحمد لله على كل حال مش عاوزين نتعبك معانا

 

ممدوح :انتى فيكى حاجة متغيرة النهاردة مالك ياإلهام انتى حاسة بحاجة بتوجعك

زورك واجعك عندك كحة

 

إلهام :انا زى الفل تمام والحمد لله

دى أقل حاجة أعملها لجوزى حبيبي هو أحنا لنا غيرك يا حبيبى

 

ممدوح : انتى متأكدة انك كويسة صارحينى حاسة بسخونة او تعب يابنتى لو تعبانه قوليلى ليكون الوباء اللى بيقولوا عليه جالك

 

إلهام : ربنا يبعد عنك وعننا المرض يا حبيبى

 

ممدوح : اللهم آمين طيب بقي انا خارج

 

إلهام : ربنا يكتبلك فى كل خطوة سلامة و يكفيك شر العين مع ألف مليون سلامة يا روحى

 

ممدوح : لأ بقى انتى النهاردة مش طبيعية وأنا مش خارج غير لما أعرف فيه ايه

(على العكس من ظن البعض الوضع المستقر ده مخلينى قلقان نحمد ربنا ليل ونهار اه.. بس الطبيعي في الدنيا هو ان الانسان يتبهدل.. لما بلاقي الدنيا ماشيه كويس بقلق وبقول استر يارب.. لان الضربة لو حصلت وقت الرخاء بتبقي قاسيه اوى)

 

إلهام : بتقول حاجة يا روحى

 

ممدوح : لا مبقولش ده انا بكلم نفسى ( والله حتجننينى بعمايلك )

 

وبعد شوية

 

ممدوح: حبيبتى انا مضطر

انزل بقى مجدى عمال يرن على الفون بينه وصل تحت البيت

 

إلهام : ماشى ياحبيبي واجب برضه

تزور صاحبك المكسر فى البيت

 

ممدوح : انتى بتتكلمى بجد؟! أنا مش مصدق والله إنى حخرج كده من غير خناق ولا زعيق ولا طلبات

 

إلهام : معهلش يا دوحة سماح بقى على اللى فات

انزل يا حبيبى وخد راحتك بس أوعى تقلع الكمامة والكحول فى إيدك علطول وممنوع السلامات يا روحى

أحنا ملناش غيرك

 

وبعد شوية

إلهام : ألوو أيووة يا ماما عملت بنصيحتك أهو وكنت كيووت على الأخر أهو

يا ساتر خليه ينزل بقى ويريحنا شوية من قعدته فى البيت و ٠٠٠٠٠

 

ممدوح : أيووة يا هانم بانى على حقيقتك وأن الحب ده كله علشان زهقتى من قعدتى بسبب الحظر

الحمد لله انى نسيت محفظتى ورجعت أخدها وسمعتك

 

إلهام : يا لهووووووى بتتصنط عليا يا دوحة

ممدوووووح طلقنى

 

يووووة أستنونى بكرة